०४ जेठ , काठमाडौं । २० स्थानीय तह रहेको सर्लाहीमा १० स्थानीय तहको मत परिणाम सार्वजनिक भइसकेको छ ।
जसमा कांग्रेसले ८ स्थानीय तहमा र माओवादी केन्द्रले २ स्थानीय तहमा विजयी हात पारेको छ । यसैक्रममा सदरमुकाम मलंगवा नगरपालिकाको मेयर र उपमेयर पदमा नेपाली कांग्रेसका उम्मेदवार निर्वाचित भएका छन् ।
कांग्रेसबाट मेयर पदका लागि उम्मेदवारी दिएका नागेन्द्रप्रसाद यादवले ९ हजार ७८ मत प्राप्त गरी निर्वाचित भए । उनका निकटम प्रतिद्वन्द्वी साहले ४ हजार ६ सय ३९ मत प्राप्त गरे । यसअघिको निर्वाचनमा कांग्रेसबाट जितेका निवर्तमान मेयर साह कांग्रेसबाट टिकट नपाएपछि जसपाबाट उम्मेदवारी दिएका थिए ।
यस्तै उपमेयरमा नेपाली कांग्रेसकै उम्मेदवार शकुन्तलादेवी साह ५ हजार १ सय ४३ मत प्राप्त गर्दै निर्वाचित भइन् । उनका निकटतम प्रतिद्वन्द्वी जसपाकै पानोदेवीले ५ हजार १ सय ३९ मत मात्र प्राप्त गरिन् । उपमेयरमा शकुन्तलादेवी मात्र ४ मतले विजयी भएकी हुन् ।
