काठमाडौ , तारकेश्वर । भ्रष्टाचार र अन्यायविरुद्धको आवाज अहिले तारकेश्वर नगरपालिकामा ‘अपराध’ बन्न थालेको छ । सत्य बोल्नेहरूलाई धम्की, झुटा आरोप र दमनले थिच्ने प्रवृत्ति देखिएको छ ।
यही सन्दर्भमा, तारकेश्वरका युवा प्रज्वल लामा अघि आएका छन् – उनी आफूलाई “सत्य र पारदर्शिताका लागि लड्ने निडर नागरिक” भनेर परिचय दिन्छन् । लामाका अनुसार, मेयर स्वयंले नै जनताको आवाज दबाउने प्रयास गर्दै आएका छन्।
“भ्रष्टाचारविरुद्ध बोल्नु अपराध होइन,” प्रज्वल भन्छन्, “तर अहिले नगरको नेतृत्वले जनताको प्रश्नलाई अपमानमा बदलिदिएको छ ।”
भ्रष्टाचारविरुद्धको शान्तिपूर्ण आन्दोलन
भदौ २३ गते तारकेश्वरका युवाहरूले नगरपालिका अगाडि भ्रष्टाचारविरुद्ध शान्तिपूर्ण प्रदर्शन गरे । उनीहरूका हातमा प्लेकार्ड थिए — ‘भ्रष्टाचार बन्द गर’, ‘हाम्रो कर, हाम्रो अधिकार’, र सबैभन्दा चर्चित नारा — “फोहर गर्नेले फोहरकै सम्मान पाउँछ !”
त्यही दिन युवाहरूले नगरप्रमुखलाई प्रतीकात्मक रूपमा ‘फोहरको उपहार’ दिएका थिए । यसले सामाजिक सञ्जालमा निकै ठूलो चर्चा पायो । धेरैले यसलाई व्यङ्ग्यात्मक तर जनभावना प्रतिबिम्बित गर्ने कदम भनेका छन्।
भोलिपल्टको दमन र आरोप
तर अर्को दिन अर्थात् भदौ २४ गते, स्थिति फेरि तातियो । नगर प्रहरी परिचालन गरेर आन्दोलनकारीहरूलाई रोक्ने प्रयास गरियो । केही समूहहरू नियन्त्रणबाहिर गए, र त्यसपछि स्थिति बिग्रियो ।
प्रज्वलको भनाइमा, “हामीले स्थिति शान्त राख्ने प्रयास गर्यौं । तर मेयरले नै प्रहरीमार्फत दमन गरेर आगोमा घ्यू हाले।”
अब उनी र उनका साथीसाथीमाथि झुटा आरोप लगाउने प्रयास भइरहेको दाबी गरिएको छ । “सत्य बोल्दा अपराध ठहरिन्छ भने, मौनता के ईमानदारी हो?” उनी प्रश्न गर्छन् ।
“नगरपालिका जल्नु समाधान होइन, कारण बुझ्न जरुरी छ”
नगरपालिकाको केही भागमा आगलागी भएपछि दोष प्रदर्शनकारीहरूलाई थोपार्ने प्रयास भइरहेको छ । तर प्रज्वल भन्छन्,
“नगरपालिका जल्नु राम्रो होइन, तर आगोको जरो भ्रष्ट नेतृत्वमै छ । यदि सत्य छानबिन हुन्छ भने सबैले स्वागत गर्छौं । तर यो प्रतिशोधको नाटक अस्वीकार्य छ ।”
सामाजिक सञ्जालमा जनताको व्यङ्ग्य
फेसबुक, टिकटक र स्थानीय चिया पसलमा अहिले एउटा कुरा बारम्बार दोहोरिँदैछ — “फोहर गर्नेले फोहरकै उपहार पाउँछ !” यो वाक्य अब तारकेश्वरको प्रतीकात्मक व्यङ्ग्य बनेको छ ।
नगरबासी भन्छन्, “युवाहरूले उठाएको प्रश्न दबाएर नगर चल्दैन । जनताको आवाज सुन्न सक्ने साहस नै नेतृत्वको शक्ति हो ।”
स्थानियको अनुमान निष्कर्ष :-
तारकेश्वरमा अहिले सत्य र सत्ता बीचको टकराव तीव्र बन्दै गएको छ । एकातिर फोहरको उपहार दिने जनता छन् , अर्कोतिर आरोपको माला लगाउने मेयर ।
अन्ततः प्रश्न एउटै रहन्छ —
स्थानियको प्रश्न :-
“सत्य बोल्नेहरू दोषी कि भ्रष्टाचार गर्नेहरू ?”
यो समाचार स्थानियहरुको गुनासोमा लेखिएको हो ।
