११६औं अन्तर्राष्ट्रिय महिला दिवसको अवसरमा प्रहरी श्रीमती संघकी अध्यक्ष नविना खत्री कार्कीबाट जारी शुभकामना सन्देश
सामाजिक सेवामा क्रियाशिल रहेर समाजमा देखा परेका विकृती र विसंगतीका विरुद्ध जनचेतनामूलक कार्यक्रमहरु संचालन गर्दै समाजलाई सृजनात्मक एवं सकारात्मक बाटोमा अघि बढाउँदै राष्ट्र विकासको मुल प्रवाहमा सरिक भई विभिन्न कार्यक्रमहरु मार्फ प्रेरणा र सन्देशहरु दिदै आईरहेको नेपाल प्रहरीको अनुकरणीय उदाहरणको रुपमा रहेको यस सेवाभावी संस्था नेपाल प्रहरी श्रीमती संघको तर्फबाट ११६ औं अन्तर्राष्ट्रिय महिला दिवसको आजको यस विशेष र गरिमामय अवसरमा देश तथा विदेशमा रहनु भएका सम्पूर्ण दिदि बहिनी तथा दाजुभाईहरुमा सुख, शान्ति, समृद्धि र उच्च स्वाभिमानको हार्दिक मंगलमय शुभकामना व्यक्त गर्दछु ।
नारी दिवस केवल एउटा क्यालेन्डरको मिति मात्र होईन, यो त नारी शक्ति पहिचान, संघर्षको सम्मान र प्राप्त उपलब्धीहरुको उत्सव हो । ११६ औं अन्तर्राष्ट्रिय नारी दिवसको यस वर्षको “Rights, Justice, Action For All Women and Girls” भन्ने अन्तर्राष्ट्रिय नारा एवं “सबै महिला र बालिकाका लागि अधिकार, न्याय र कार्य सहितको अवसर” भन्ने यस बर्षको मर्म स्पर्शी राष्ट्रिय नारालाई नारामा मात्र सिमित नराखी व्यबहारमा लागू गर्नुपर्ने आजको आवश्यकता रहेको छ ।
हाम्रो शास्त्रले भन्छ “यत्र नार्यस्तु पुज्यन्ते रमन्वे तत्र देवता” अर्थात जहाँ नारीको सम्मान हुन्छ, त्यहाँ देवताको बास हुन्छ । आजको आधुनिक युगमा महिलालाई सम्मान भन्दा बढी “अधिकार, अवसर र न्यायको खाँचो छ ।
नारी केवल जननी मात्र होइनन, उनी त परिवारको अभिभावक, समाजको ऐना र राष्ट्र निर्माणको सारथी हुन । आजका नारीहरुले चुलो चौका देखि अन्तरिक्ष सम्मको यात्रा सम्म र राजनितिक उच्च अहोदा देखि उद्यमशिलता सम्म आफ्नो क्षमता प्रामाणित गरिसकेका छन ।
महिला सशक्तिकरणको साँचो शुरुवात तब हुन्छ, जब समाजले नारीको यो योगदानलाई सम्मान गर्छ र उनलाई आर्थिक रुपमा आत्मनिर्भर बन्ने अवसर प्रदान गर्दछ । घरेलु हिंसा, कार्यस्थलमा हुने विभेद र सामाजिक सञ्जालमा महिलाहरु माथि हुने हिंसा आजको नयाँ चुनौतीको रुपमा देखा परेका छन ।
यस्ता चुनौतीहरुलाई चिर्नको लागि कानुनी कठोरता मात्र होइन सामाजिक सोच पनि ‘क्रान्ति’ आवश्यक रहेको छ ।
नारी दिवस केवल महिलाहरुले मात्र मनाउने उत्सव होइन, यो त एउटा न्यायपूर्ण समाज निर्माण गर्ने संकल्प पनि हो । जसमा पुरुषहरुको सहभागिता अनिवार्य रहन्छ। लैङ्गिक समानता भनेको पुरुष र महिला विचको विभेद होइन । बरु यो त काँधमा काँध मिलाएर हिड्ने सहयात्रा हो ।
एउटा भनाई छ कि “यदि हामीले एउटा पुरुषलाई शिक्षित बनायौं भने एउटा व्यक्तिलाई शिक्षित बनाउँदछौ, तर यदि एउटी नारीलाई शिक्षित बनायौ भने हामीले सिंगो पुस्तालाई नै शिक्षित बनाउछौ” ।
अन्त्यमा, महिला सशक्तिकरणको अर्थ पुरुषसंगको प्रतिस्पर्धा मात्र होइन, बरु आत्मसम्मानका साथ बाँच्न पाउनु र आफ्नो निर्णय आफै गर्न पाउनु हो । नारी शिक्षित र आत्मनिर्भर भए मात्र एउटा परिवार, समाज एवं राष्ट्र समृद्ध बन्छ । नारी दिवसको यो अवसरमा हामी सबैलाई लैङ्गिक समानता कायम गर्न र महिलाहरुको अधिकार सुनिश्चित गर्न थप उर्जा र प्रेरणा प्राप्त होस् भन्ने कमना व्यक्त गर्दछु ।
आजको यो ऐतिहासिक दिनमा हामी सबैले संकल्प गरौं । “हामी आफ्नो घर, समाज र कार्यस्थलमा लैङ्गिक विभेद हुन दिने छैनौं, नारीको सम्मान नै सभ्य समाजको पहिचान हो” भन्दै नारी दिवसको यस गरिमामय अवसरमा पुनः एकपटक सम्पूर्ण दिदिबहिनी तथा दाजुभाईहरुलाई हार्दिक शुभकामना व्यक्त गर्न चाहन्छु ।
