१२ जेठ ,काठमाडौ । स्वास्थ्य तथा जनसङ्ख्या मन्त्रालयले व्यक्तिगत वा अन्य कुनै तरिकाले लगिएका अक्सिजन सिलिण्डर फिर्ता गर्न आग्रह गरेको छ ।
पछिल्ला केही दिन यता अक्सिजनका सिलिण्डर अभाव भएपछि व्यक्तिगत, संस्थागत, आइसोलेशन केन्द्र र अस्पतालमा प्रयोगका लागि लगिएका सिलिण्डर जुन कम्पनी वा अस्पतालको हो उसैलाई फिर्ता गर्न मन्त्रालयका सहप्रवक्ता डा।समिरकुमार अधिकारीले आज सूचना जारी गर्दै अनुरोध गरेका हुन् ।
‘यसले आगामी दिनमा समस्या निम्त्याउने देखिन्छ’, सहप्रवक्ता अधिकारीले जारी गरेको सूचनामा भनिएको छ, ‘विभिन्न व्यक्ति तथा सङ्घसंस्थाले व्यक्तिगत, आइसोलेसन केन्द्र र अस्पतालमा प्रयोगका लागि विभिन्न तरिकाले लगेका अक्सिजन सिलिण्डर समयमा नै जुन कम्पनी वा अस्पतालका सिलिण्डर हुन तिनै अक्सिजन उत्पादक कम्पनी वा अस्पतालमा पुग्ने गरी आवश्यक व्यवस्था मिलाउन अनुरोध छ।’
अक्सिजन सिलिण्डरहरु देशका दुरदराजमा वा व्यक्तिका घरहरुमा थन्किएर रहेमा अस्पतालमा सघन उपचाररत संक्रमितहरुलाई अप्ठयारो हुने भएकाले सबैलाई संवेदनशील बन्न समेत मन्त्रालयले अनुरोध गरेको छ ।
महामारीको समयमा अक्सिजन जस्तो औषधीय विषयमा प्राविधिक ज्ञान र विवेकभन्दा बाहिर गएर निर्णय गर्ने र गराउने कार्यलाई बन्द गर्न र गराउन तथा अस्पतालको आपूर्ति प्रणालीभन्दा बाहिर नजाने गरी समन्वयको व्यवस्थापन गर्न समेत सूचनामार्फत अनुरोध गरिएको छ ।
