१८ पुष ,काठमाडौ । नेकपा माओवादी केन्द्रले २९९ सदस्यीय केन्द्रीय समिति सदस्य टुंग्याएको छ ।
बन्दसत्र सुरु हुनुअघि आइतबार बसेको पार्टी स्थायी समिति बैठकमा अध्यक्ष पुष्पकमल दाहाल ‘प्रचण्ड’ले प्रदेशबाट आएका सिफारिसका आधारमा २९९ सदस्यीय केन्द्रीय कमिटी सदस्यको नाम टुंगिएका जानकारी दिएका हुन् ।
स्थायी समिति बैठकपछि नेता गणेश शाहले बन्दसत्रमा अध्यक्ष प्रचण्डले नाम पढेर सुनाउने जानकारी दिएका थिए । बन्दसत्रले केन्द्रीय कमिटी सदस्यहरुको नाम अनुमोदन गरेलगत्तै केन्द्रीय कमिटी बैठक बसेर १५ सदस्यीय पदाधिकारी चयन गर्ने शाहको भनाइ छ ।
काठमाडौंमा जारी माओवादीको आठौँ महाधिवेशनले यसअघि प्रचण्डको राजनीतिक तथा वैचारिक प्रतिवेदन र विधान संशोधन प्रस्ताव सुझावसहित पारित गरेको छ । आजै नयाँ नेतृत्व चयन गरेर महाधिवेशन समापन गर्ने माओवादीको तयारी छ ।
