१ असार , काठमाडौं । मेक्सिकोमा सुरक्षा कारवाहीमा परी कम्तीमा पनि १० जना बन्दुकधारीको ज्यान गएको छ ।
राजधानी मेक्सिको सिटीबाट १३० किलोमिटर दक्षिणपश्चिममा रहेको टेहकालटिट्लान नगरमा प्रहरीले गरेको कारवाहीमा १० बन्दुकधारी मारिएको अमेरिकी टेलिभिजन च्यानल एबीसीको अनलाइन संस्करणले जनाएको छ ।
सुरक्षाकर्मीको कारवाहीमा अरु ४ जना घाइते भएका छन् । घाइतेहरुको अवस्था सामान्य रहेको जनाइएको छ ।
सो क्षेत्रमा सरकारी अधिकारीहरुले संदिग्ध अपराधीहरुलाई पक्राउका लागि पूर्जी लिएर गएको र त्यस क्रममा त्यहाँ रहेका बन्दुकधारीहरुले सुरक्षा टोलीमाथि नै गोली चलाएको जनाइएको छ । सो क्षेत्रमा बारम्बार आपराधिक घटनाहरु हुँदै आएको बताइन्छ ।
दोहोरो गोली हानाहानमा ती बन्दुकधारी मारिएका प्रहरी अधिकारीले जनाएका छन् । त्यस कारवाहीका क्रममा अरु सात जना बन्दुकधारीलाई पक्राउ गरिएको छ ।
अधिकारीहरुले घटनास्थलबाट २० राइफाल, पेस्तोल, गोलीगठ्ठा, सैनिक पोसाक र बुलेटप्रुफ भेष्ट बरामद गरेको एबीसीले जनाएको छ ।
