छाडा चौपायाबाट बाली जोगाउनै मुस्किल -
Comments Add Comment

छाडा चौपायाबाट बाली जोगाउनै मुस्किल

३० पुष , काठमाडौं । कञ्चनपुरको भीमदत्त नगरपालिका–६ का सरस्वती भट्टको पाँच कट्ठा खेतमा लगाएको गहुँ बाली छाडाचौपायाले सखाप पारिदियो । खेतमा मात्रै होइन छाडा चौपाया उनको बारीमै पसेर तरकारी खेतीसमेत नोक्सान गरिदियो । ‘खेतमा तारबार गरेकी छु, तर बार तोडेर गहुँ सखाप पारिदियो’, उनले भने, ‘छाडाचौपायाका कारण बाली जोगाउनै मुस्किल भयो ।’ भट्टले छाडा चौपाया घरभित्रै पसेर नोक्सानी गर्न थालेको बताए । पछिल्लो समय छाडा पशुचौपायाको विकराल समस्या बनेको छ । स्थानीय सरकारले लाखौँ रकम छाडा चौपाया व्यवस्थापनमा खर्च गरे पनि दिगो व्यवस्थापन नहुँदा एकातर्फ किसानको खेतमा नोक्सानी पुग्ने गरेको छ भने अर्कोतर्फ सडक दुर्घटनाको जोखिम पनि उत्तिकै छ ।

शुक्रबार छाडा चौपायाबाट हैरानी खेपेका स्थानीयले सडकका चौपाया एकत्रित गरेर भीमदत्त नगरपालिका परिसरमा पुर्‍याएका थिए । व्यवस्थापन चुनावी ऐजेन्डा बनाएका जनप्रतिनिधिले निर्वाचित भएको छ महिना बितिसक्दासमेत समस्या समाधान नगरेको भन्दै आक्रोशित भएका स्थानीयले नगरपालिकामा छाडा चौपाया ल्याएर छोडेका थिए ।

नगरपालिकाको प्रवेशद्वारभित्र छाडा चौपाया हुल्न खोजेपछि रोक्न खोज्दा आक्रोशित स्थानीय र प्रहरीबीच केहीबेर धकेलाधकेलसमेत भयो । स्थानीय कृष्णदत्त जोशीले नगरपालिकाले छाडा चौपाया व्यवस्थापन गर्न नसक्दा किसानको अन्नबाली नष्ट भएको बताए।

‘अहिलेसम्म नगरपालिकाले छाडा चौपायाको व्यवस्थापन गर्न सकेको छैन, बाली खाएर सखाप पारेको छ’, उनले भने, ‘नगरपालिकाले व्यवस्थापन नगर्दा किसान मारमा परेका छन् ।’ निर्वाचनका बेला छाडा चौपाया व्यवस्थापन गर्छु भनेर मत मागेका जनप्रतिनिधिले वाचा पूरा नगरेको उनको आरोप छ ।

भीमदत्त नगरपालिकाका नगर प्रवक्ता महेन्द्र खड्काले छाडा चौपाया व्यवस्थापनका लागि काम अगाडि बढाएको बताए । ‘छाडा चौपाया व्यवस्थापनका लागि समिति बनाएर काम गर्दैछौँ, कुन ठाउँमा राख्न सकिन्छ भनेर जग्गा खोज्ने काम भइरहेको छ’, उनले भने, ‘जग्गा प्राप्तीपछि छिट्टै व्यवस्थापनमा लाग्छौँ ।’

छाडा चौपायाले जिल्लाभर किसानले लगाएको अन्नबाली नोक्सानी गर्ने गरेका छन् । यसअघि बेदकोट नगरपालिकामा पनि छाडा चौपाया व्यवस्थापन नगरेको भन्दै स्थानीयले आन्दोलन गरेका थिए ।

यो खबर पढेर तपाईलाई कस्तो महसुस भयो ?

सम्बन्धित खवर

Advertisment

छुटाउनुभयो कि? सबै


This will close in 20 seconds