काठमाडौं: केकमा गाँजा मिसाएर बेचेको आरोपमा प्रहरीले एक जनालाई पक्राउ गरेको छ।
लागु औषध नियन्त्रण ब्युरोले गत शुक्रबार काठमाडौं महानगरपालिका-१९ घट्टेकुलो बस्ने २६ वर्षीय विशन मानन्धरलाई पक्राउ गरेको हो।
ब्युरोका प्रवक्ता एसपी चक्रराज जोशीले पुस २० गते घरबाटै पक्राउ गरिएका विशनले इन्स्टाग्राममा बम्ब डट उङ नेपाल (bamb.oong nepal) नामक अकाउन्ट बनाई अवैध लागुऔषध प्रयोग गरी मफिनलगायत केक बनाई बिक्री गर्ने गरेको पाइएको बताए।
इन्स्टाग्राम bamb.oong_nepal नामको अकाउन्ट बनाएर गाँजा मिसाएर मफिन लगायत केक बनाएर बिक्री गरिरहेको भन्ने सूचना ब्युरोले पाएको थियो। उक्त सूचनापछि प्रहरी उनको कोठामा पुगेको थियो।
त्यहाँबाट प्रहरीले गाँजाको १२१ ग्राम धुलो, तयारी अवस्थाको केकको १७८ ग्राम झोल, ३ किलो ७५४ ग्राम गाँजा, एउटा डिजिटल तराजु, एउटा ओभन, एटिएम, लगायत बरामद गरेको छ।
पक्राउ परेका विशनले आफ्नो घरमा एक वर्षदेखि गाँजा मिसावट गरिएका केक बनाएर अनलाइन डेलिभरी गर्ने गरेको एसपी जोशीले बताए। उनको इन्स्टाग्राम पेजमा ६१४ जना फलोअर्स समेत छन्।
अनुसन्धानको क्रममा उनले गाँजाको केकको मेनु नै बनाएको पनि खुलेको छ।
द इपिपहेन्सी ब्रेड, ह्यापी कप्स, बज लाइटीयर, न्यास्टी क्यान्डी लगायत नामका केकहरू बनाएर बेच्ने गरेको पाइएको हो। यसरी उनले केक बनाएर इनड्राइभमार्फत बेच्ने गरेको पनि प्रहरीले जनाएको छ।
