प्रहरी उपरीक्षक (एसपी) बाल नरसिंह राणाले कैलाली प्रहरीको जिम्मेवारी सम्हालेका छन् ।
नेपाल प्रहरी प्रदेश कार्यालय अपराध अनुसन्धान शाखा बनेपा, काभ्रेपलाञ्चोकबाट जिल्ला प्रहरी कार्यालय कैलालीको प्रमुखमा सरुवा भएका राणाले मंगलबार जिम्मेवारी सम्हालेका हुन् ।
उनलाई निमित्त कार्यालय प्रमुख प्रहरी नायब उपरीक्षक नविनराजा बुढाथोकी, प्रवक्ता प्रहरी नायव उपरीक्षक राजकुमार सिंहलगायतले स्वागत गरेका थिए ।
एसपी राणाले एक औपचारिक समारोहबीच पदभार ग्रहण गर्नुभएको हो। राणाले आफू जनतामैत्री, पारदर्शी र कडाइका साथ कार्य गर्न प्रतिबद्ध रहेको स्पष्ट पार्नुभयो। उहाँले भन्नुभयो, “कैलाली सुदूरपश्चिमको राजधानी भएकाले यस जिल्लालाई हरेक हिसाबले नमूना बनाउन म उत्कृष्ट प्रयास गर्नेछु।हामी नागरिकका प्रहरी हौं भन्ने अनुभूति प्रत्येक जनतालाई हुने वातावरण बनाइनेछ।”
बढ्दो सवारी दुर्घटना, लागूऔषध दुर्व्यसन र जघन्य अपराध नियन्त्रण आफ्नो पहिलो प्राथमिकता हुने उल्लेख गर्दै, उहाँले शान्ति सुरक्षाको सवालमा शून्य सहनशीलता अपनाइने र त्यसका लागि सबैको सहयोग अपेक्षित रहेको बताउनुभयो।
एसपी राणाको नेतृत्वमा कैलालीमा नयाँ ऊर्जा र विश्वाससहितको प्रहरी सेवा सञ्चालन हुने आशा गरिएको छ।
