काठमाडौं । तारकेश्वर नगरपालिका–१, साङ्लास्थित बालकुमारी माध्यमिक विद्यालयमा जय इन्द्रायणी बचत तथा ऋण सहकारी संस्था लिमिटेडको १७औँ वार्षिक साधारण सभा सम्पन्न भएको छ।
तारकेश्वर नगरपालिका वडा नम्बर १ का वडा अध्यक्ष विदुर सापकोटाको प्रमुख आतिथ्यतामा सम्पन्न सभामा संस्थाका सञ्चालक समिति तथा लेखा समितिका पदाधिकारी, कर्मचारी, सेयर सदस्य तथा साधारण सदस्यहरूको सहभागिता रहेको थियो।
साधारण सभामा संस्थाको वार्षिक प्रगति, आर्थिक अवस्था, सेवा प्रवाह तथा आगामी कार्ययोजना लगायतका विषयमा छलफल गरिएको थियो। संस्थाका पदाधिकारीहरूले सहकारीलाई थप व्यवस्थित, पारदर्शी तथा सदस्यकेन्द्रित बनाउँदै अघि बढाउने प्रतिबद्धता व्यक्त गरेका थिए।
जय इन्द्रायणी सहकारीले आर्थिक कारोबारसँगै सामाजिक उत्तरदायित्वका विभिन्न कार्यक्रमहरू समेत सञ्चालन गर्दै आएको जनाएको छ। संस्थाले समय–समयमा रक्तदान कार्यक्रमलगायत सामाजिक सेवामूलक गतिविधि गर्दै आएको छ।
यसैगरी, संस्थाका सदस्यका छोराछोरीले एसएलसी/एसईई परीक्षा उत्तीर्ण गरेपछि सम्मान गर्ने कार्यक्रम समेत सञ्चालन गर्दै आएको जानकारी दिइएको छ। सदस्यका परिवारका उपलब्धिलाई प्रोत्साहन गर्ने उद्देश्यले यस्तो सम्मान कार्यक्रम गर्दै आएको संस्थाले जनाएको छ।
विपद्को समयमा समेत संस्थाले सहयोग गर्दै आएको छ। भोटेकोशी क्षेत्रमा आएको बाढीबाट प्रभावित पीडितका लागि नेपाल सरकारको प्रधानमन्त्री दैवी प्रकोप उद्धार कोषमा आर्थिक सहयोग गरेको जानकारी सभामा गराइएको थियो।
त्यस्तै, संस्थामा आबद्ध सदस्यको घरपरिवारमा अप्रिय घटना वा दुःखद् अवस्था सिर्जना हुँदा राहतस्वरूप ५० हजार रुपैयाँसम्म सहयोग गर्दै आएको समेत जानकारी दिइएको छ। सदस्यको सुख–दुःखमा साथ दिने उद्देश्यले यस्तो सहयोगको व्यवस्था गरिएको संस्थाले जनाएको छ।
२०६६ सालमा स्थापना भएको जय इन्द्रायणी सहकारीले बचत तथा ऋण सेवासँगै सदस्य हित, सामाजिक उत्तरदायित्व, रक्तदान, शैक्षिक सम्मान तथा विपद् सहयोगलगायतका गतिविधिलाई निरन्तरता दिँदै आएको छ।
साधारण सभामा सहकारीको आगामी योजना, सदस्यको हित, संस्थागत विकास तथा दीर्घकालीन रणनीतिका विषयमा समेत छलफल गरिएको थियो।
