६ कार्तिक , काठमाडौ । कीर्तिपुरको बाघभैरव मन्दिरबाट हराएको गणेशको प्रस्तर मूर्ति अमेरिकाको सान फ्रान्सिस्कोस्थित निजी संग्रहालय जानडु ग्यालरीमा फेला परेको छ ।
नेपाली कला सम्पदाको पहिचान तथा घरफिर्ती अभियानको सहयोगी लस्ट आर्टस् अफ नेपाल अभियानले दिएको सूचनामा, फेला परेको गणेश मूर्तिलाई १७ औं शताब्दीको सिर्जना मानिएको छ ।
यही ग्यालरीमा गत साता मात्रै काठमाडौंको ज्याठाबाट हराइरहेको गणेश भगवानको नृत्यरत मुद्राको टुाडाल फेला परेको थियो । सन् ८० को दशकमा ज्याठाको छुस्या बहालबाट चोरी भएको टुाडाल जानडु ग्यालरीमा फेला परेको हो ।
यसैगरी, गत साता मात्रै यही ग्यालरीमा पाटनको गुइत टोलको बौद्ध बिहारबाट हराइरहेको भगवान बुद्धको प्रस्तर मुर्ति फेला परेको थियो । नवौं शताब्दीमा निर्माण भएको मानिने अक्षोभ्य बुद्धको मूर्ति पनि पाटनबाट सन् ८० को दशकमै हराइरहेको थियो ।
