काठमाडौँ । रक्तचन्दनको तेलको अवैध रूपमा कारोबार गरेको आरोपमा प्रहरीले ८ जनालाई पक्राउ गरेको छ । काठमाडौँको चुच्चेपाटीमा ८० लिटर रक्तचन्दनको तेल प्रति लिटर रु २ लाख ५० हजारका दरले अवैध कारोबार भइराखेको गोप्य सूचनाको आधारमा काठमाडौँ उपत्यका अपराध अनुसन्धान कार्यालयको टोलीले उनीहरूलाई पक्राउ गरेको हो ।
पक्राउ पर्नेमा काठमाडौँका ३० वर्षीय सुशील पाठक, कालिकोटका २८ वर्षीय विनोद बराल, सुर्खेतका ३६ वर्षीय ज्ञान बहादुर ओली, रामेछापका ३५ वर्षीय नवीन दाहाल र ३९ वर्षीय गोकर्ण हरि दाहाल, बाँकेका ५८ वर्षीय निल कान्त भुसाल, धादिङका ६३ वर्षीय मोहन बहादुर विश्वकर्मा र सोलुखुम्बुका ४० वर्षीय खेमराज घिमिरे रहेका छन् ।
उनीहरूलाई रक्त चन्दनको तेल सहित आवश्यक कारबाहीको लागि डिभिजन वन कार्यालय हात्तीसार पठाइएको छ ।
