१२ मंसिर , काठमाडौ । जिल्ला प्रहरी कार्यालय दोलखामा कार्यरत प्रहरी जवान सुजन खड्काको हृदयाघातबाट मृत्यु भएको छ । शनिबार ड्युटीमा रहेकै बेला खड्कालाई हृदयाघात भएको हो ।
जिल्ला प्रहरीका प्रमुख डीएसपी भेषराज रिजालका अनुसार खड्का बिहान १० देखि २ बजेसम्मको ड्युटीमा थिए । ‘ड्युटीकै क्रममा उनी अचानक बेहोस भएपछि अस्पताल लग्यौं,’ डीएसपी रिजालले भने, ‘तर बचाउन सकेनौं ।’
खड्कालाई चरिकोट अस्पतालमा लगिएकोमा चिकित्सकले बेलुका सवा ६ बजे मृत्यु भएको जनाएका थिए । खड्का इलाका प्रहरी कार्यालय गौरीशंकर दोलखामा दरबन्दी भई जिल्ला प्रहरी कार्यालयमा कार्यरत थिए ।
‘प्रहरी परिवारको सदस्यको निधनले हामी पनि अहिले शोकमग्न छौं,’ डीएसपी रिजालले भने । परिवारलाई शव बुझाइसकेको प्रहरीले जनाएको छ ।
