काठमाडौं — वाणिज्य, आपूर्ति तथा उपभोक्ता संरक्षण विभागले अनलाइन प्लेटफर्म र सामाजिक सञ्जालमार्फत बिक्री भइरहेका १०० भन्दा बढी शङ्कास्पद नक्कली दैनिक उपभोग्य वस्तु नियन्त्रणमा लिएको छ।
विभागका अनुसार नियन्त्रणमा लिइएका वस्तुमा मसाज तेल, स्याम्पु, चिया, खाद्य पूरक आहारलगायतका सामग्री रहेका छन्। ती उत्पादनको गुणस्तर, मौलिकता तथा उपभोगयोग्यता परीक्षण भइरहेको छ।
विभागका महानिर्देशक मोतिराम सापकोटाले उपभोक्ताको स्वास्थ्य र अधिकार संरक्षणका लागि बजार अनुगमनलाई तीव्र बनाइएको बताए। उनका अनुसार परीक्षण प्रतिवेदनका आधारमा सम्बन्धित उत्पादनमाथि आवश्यक कानुनी प्रक्रिया अघि बढाइनेछ।
विभागले बजारमा शङ्कास्पद वा नक्कली उत्पादन देखिएमा सम्बन्धित निकायलाई जानकारी गराउन उपभोक्तासँग आग्रह गरेको छ।
