काठमाडौं : काठमाडौंको चन्द्रागिरि नगरपालिका – २ नागढुंगास्थित चेक प्वाइन्टबाट लागुऔषधसहित एकजना पक्राउ परेका छन् ।
पक्राउ पर्नेमा झापाको कमल गाउँपालिका–१ सरणपाडाका २८ को सन्देश पाठक रहेका छन् । उनको साथबाट २० ग्राम ‘खैरो हिरोइन’ बरामद गरिएको प्रहरीले जनाएको छ ।
प्रहरीका अनुसार आज काँकडभिट्टादेखि काठमाडौंतर्फ आउँदै गरेको प्रदेश–१–००१ ख.३८४४ नम्बरको यात्रुबाहक बसलाई चेकजाँच गर्ने क्रममा उनलाई पक्राउ गरिएको हो । बसको पछाडि सिटमा सवार उनको साथमा प्रहरीले कालो रंगको प्लास्टिकमा बेरी ल्याएको लागुऔषध खैरो हिरोइन भेटाएको थियो ।
उनीमाथि थप अनुसन्धान भइरहेको छ ।
