समुद्री आँधीले निम्त्याएको भीषण वर्षाले संयुक्त अरब एमिरेट्स (युएई)को वित्तीय सहर दुबई जलमग्न भएको छ । वर्षाले राजमार्गमा भल बग्दा आवागमन अवरुद्ध भएको थियो । त्यस्तै वर्षापछि दुबईस्थित विमानस्थल पनि पानीमा डुबेको देखिएको थियो ।
यात्रुलाई बुधबार अत्यावश्यक काम नभएसम्म विमानस्थल नआउन आग्रह गरिएको थियो । युएईमा २४ घन्टामै दुई सय ५४ मिलिमिटर वर्षा भएको थियो । यही मुसलधारे पानीका कारण त्यहाँका ६ लेन एक्सप्रेस–वे जलमग्न थिए । सडकमा पानीमा डुबेका वाहनको लामो लाइन बनेको थियो ।
प्रहरीका अनुसार युएईका सात इमिरेटमध्येको एक रास अल–खैमामा बाढीले एक कार बगाउँदा त्यसमा सवार ७० वर्षीय व्यक्तिको मृत्यु भएको छ । समुद्री आँधी ओमानमा वितण्डा मच्चाएर सोमबारदेखि युएई र बहराइन प्रवेश गरेको थियो । आँधीका कारण ओमानमा बालबालिकासहित १८ जनाको ज्यान गएको थियो ।
चरम मौसमी घटनामा जलवायु परिवर्तनको भूमिकाको आकलन गर्ने मौसमविद् फ्रेडरिक ओट्टोले विश्वव्यापी तापक्रम वृद्धिले आँधीलाई थप खराब बनाएको बताए । युएईको सरकारी सञ्चारमाध्यमले जनाएअनुसार मंगलबारको वर्षा ७५ वर्षयताकै ठूलो हो ।
