काठमाडौँ । काठमाडौँ महानगरपालिका वडा नम्बर १६ स्थित भानुटोल विकास समितिको आयोजनामा आज भानुटोल क्षेत्रमा व्यापक सरसफाई कार्यक्रम सम्पन्न भएको छ ।
“सफा टोल, सुन्दर टोल” भन्ने नाराका साथ सञ्चालन भइरहेको यो सरसफाई अभियान प्रत्येक महिनाको २६ गते आयोजना हुँदै आएको छ, र आजको कार्यक्रम सो अभियानको ८ औँ महिनामा प्रवेश गरेको हो ।
भानुटोल विकास समितिका अध्यक्ष तथा सरसफाई अभियानका प्रमुख अभियन्ता देवेन्द्रकुमार श्रेष्ठका अनुसार, “सरसफाई केवल वरिपरिको फोहोर हटाउने काम मात्र होइन, यो हाम्रो स्वास्थ्य, सोच र चेतनाको प्रतीक हो। हामीले आफ्नो घर, टोल र समाज सफा राख्यौं भने हाम्रो देश र संसार पनि सफा हुन्छ।”
श्रेष्ठले निरन्तर नेतृत्व गर्दै स्थानीय बासिन्दालाई हरेक महिनाको अभियानमा सहभागी गराउँदै आएका छन्। उहाँको नेतृत्वमा भानुटोलका बासिन्दाहरू बिहानैदेखि सडक, ढल, र सार्वजनिक स्थल सफा गर्न जुटेका थिए। टोलका सबै घरधुरीबाट जनसहभागिता बढ्दै गएको छ र सरसफाई अभियानले सामाजिक एकता र सहकार्यको राम्रो उदाहरण प्रस्तुत गरेको छ।
एक स्थानीय बासिन्दाले भने, “यदि हरेक टोलमा देवेन्द्रजस्ता समर्पित व्यक्ति भए, टोल आफैं सफा र व्यवस्थित हुन्छ।”
देवेन्द्रकुमार श्रेष्ठ केवल विकास समितिका अध्यक्ष मात्र होइनन्, समाजसेवामा पनि अग्रणी व्यक्ति मानिन्छन्। रातको मध्यरातमा पनि टोलमा समस्या परे उनी तत्काल उपस्थित हुने गर्छन्। समुदायमा आएको सानोदेखि ठूला समस्या समाधानमा उनको सक्रियता उल्लेखनीय छ।
आजको सरसफाई कार्यक्रममा काठमाडौँ महानगरपालिका वातावरण विभागका कर्मचारीहरू, भानुटोल विकास समितिका सदस्यहरू र स्थानीय बासिन्दाको उत्साहजनक उपस्थिति रहेको थियो। कार्यक्रममा वातावरण सफाई विभागका प्रतिनिधिले पनि यस्तो निरन्तर प्रयासले महानगरलाई सफा र हरित बनाउने अभियानमा ठूलो सहयोग पुग्ने बताएका छन्।
देवेन्द्रकुमार श्रेष्ठले अन्त्यमा भन्नुभयो, “सरसफाई हाम्रो जिम्मेवारी मात्र होइन, हाम्रो संस्कृतिको हिस्सा हो। हामी सबै मिलेर काठमाडौँलाई सफा, हरित र सुन्दर बनाऔं।”
