जनकपुरधाम । धनुषामा आफ्नै सौतेनी आमाको हत्या गरेको आरोपमा एकजना पक्राउ परेका छन् ।
बासी खाना खान दिएको भन्ने विषयमा विवाद हुँदा भारतीय नागरिक हाल धनुषाको गणेशमान चारनाथ-४ शिवनगर बस्दै आएका २० वर्षीय प्रेमकुमार भगतले सौतेनी आमा मीरादेवी भगतको हत्या गरेका हुन् ।
जिल्ला प्रहरी कार्यालय धनुषाका अनुसार हत्या आरोपमा प्रेमलाई प्रहरीले शनिबार राति पक्राउ गरेको हो ।
घरमा कोही नभएका बेला बासी भात खान दिएको विषयमा विवाद हुँदा सौतेनी आमा मीराले चिरपटले प्रहार गर्न खोज्दा बचाउका लागि सोही चिरपटले हानेपछि उनको मृत्यु भएको र घटना ढाकछोप गर्न जलाएको भन्ने कुरा प्रेमले स्वीकार गरेको धनुषा प्रहरीले जनाएको छ ।
घटनाबारे थप अनुसन्धान भइरहेको प्रहरीले जनाएको छ ।
