धादिङ, १० भदौ २०८२ – सिद्धलेक गाउँपालिकाका अध्यक्ष परशुराम खतिवडाले सञ्चारमाध्यमको कार्यालयमा नगर प्रहरीको टोलीसहित पुगी पत्रकारलाई धम्की दिएको घटनाप्रति नेपाल पत्रकार महासंघले कडा आपत्ति जनाएको छ।
अध्यक्ष खतिवडाले धादिङ न्युज डटकमका प्रधान सम्पादक केशव अधिकारी र बागमती कलम डटकमका प्रधान सम्पादक अनिल कुमार नेपालीलाई धम्की दिएको महासंघ धादिङ शाखाले जनाएको छ।
महासंघका अनुसार, गाउँपालिकाको शिक्षक सरुवा तथा विद्यालय समायोजनसम्बन्धी निर्णयमा आधारित समाचारप्रति असहमति जनाउँदै अध्यक्ष खतिवडा सञ्चारमाध्यमको कार्यालयमै पुगी दुर्व्यवहार र धम्की दिने कार्यमा संलग्न भएका थिए। यो घटना प्रेस स्वतन्त्रतामाथिको ठाडो हस्तक्षेप भएको महासंघले ठहर गरेको छ।
नेपाल पत्रकार महासंघका महासचिव रामप्रसाद दाहालले सोमबार एक विज्ञप्ति जारी गर्दै भने, “प्रकाशित समाचारप्रति असहमति भए कानुनी विधि अनुसरण गर्न सकिने व्यवस्था हुँदाहुँदै पत्रकारमाथि धम्की दिनु प्रेस स्वतन्त्रता विरोधी कार्य हो।” उनले यो घटनाको कडा निन्दा गर्दै प्रेसको अधिकारमाथि हस्तक्षेप नगर्न सम्बन्धित पक्षसँग आग्रह गरेका छन्।
महासंघले पत्रकारलाई धम्की दिने कार्यमा संलग्न व्यक्तिहरूलाई कारबाही गर्न सम्बन्धित निकायसँग माग गरेको छ। साथै, प्रेस स्वतन्त्रताको रक्षा गर्न र पत्रकारको सुरक्षामा विशेष ध्यान दिनसमेत अख्तियारी प्राप्त निकायलाई आग्रह गरेको छ।
यस घटनाले स्थानीय स्तरमा प्रेस स्वतन्त्रतामाथि गम्भीर प्रश्न उठाएको छ। महासंघले पत्रकारको पेशागत सुरक्षाका लागि थप पहल गर्ने र यस्ता गतिविधिविरुद्ध कडा कदम चाल्ने जनाएको छ।
