१३ जेठ , काठमाडौं । नेकपा माओवादी केन्द्रका अध्यक्ष पुष्पकमल दाहाल ‘प्रचण्ड’ ले निकै राम्रो समाज र राज्य बनाउने चाहाना राखेपनि दिनदिनैको
कामकारवाही भनाइसँग तालमेल नहुने गरेको बताएका छन् । शुक्रबार २१ औं कृष्णसेन इच्छुक स्मृति दिवसका अवसरमा भएको कार्यक्रमलाई सम्बोधन गर्दै अध्यक्ष प्रचण्डले कही न कहि हाम्रो सिस्टमभित्र थुप्रै खोटहरू रहेकाले समाज रुपान्तरण र क्रान्तिकारी बाटोमा जानुको साटो दिग्भ्रम र विचलनतिर गइरहेको र त्यो क्रम बढ्दो रहेको बताए ।
‘कहीँ न कहीँ हाम्रो सिस्टमभित्र थुप्रै खोटहरू छन् । जसले गर्दा समाज रुपान्तरण क्रान्तिकारी ढंगले होइन दिग्भ्रम र विचलनतिर गइरहेको छ र त्यो क्रम अझ बढ्दो छ’, अध्यक्ष प्रचण्डको भनाइ छ । उनले सबैले नयाँ अभियान, अनुसन्धान र नयाँ आविष्कारको खोजीमा लागे मात्रै समाज र राष्ट्रलाई केही दिन सकिने र समाज रुपान्तरण गर्न सकिने पनि बताए ।
‘समाज रुपान्तरण र क्रान्तिकारीतिर जाने होइन, दिग्भ्रमिततिर गइरहेको छ । विचार र सिद्धान्त भन्दा क्षणिक र अस्वस्थ प्रतिस्पर्धामा समाज गइरहेको हामीलाई भ्रम हुन्छ’ प्रचण्डको भनाइ छ । त्याग र साधनाको संस्कृति अपनाउने कुरामा प्रतिवद्ध भएमात्रै कृष्ण सेनप्रति सच्चा श्रद्धाञ्जली हुने पनि प्रचण्डले बताए । उनले सेनसँगका सहकार्यका स्मृति आफुसँग अझै ताजै रहेको भन्दै तपस्या र साधनामा केही कमी नभएका सेनमा बलिदानको उच्च भावना पनि रहेको बताए ।
‘उहाँ त्याग र तपस्याको प्रतीक पनि हो । साधना, जिम्मेवारी, साहित्य संस्कृति वा पार्टीको जिम्मेवारी पुरा गर्न तपस्यारत हुनुहुन्थ्यो । यस्तो व्यक्तित्व सजिलै जन्मन सक्दैनन्’, उनले भने, ‘हामी पनि तपस्या गर्नसक्ने, जस्तोसुकै प्रतिकूल अवस्था रहेपनि निरन्तर साधनारत रहने हामीले त्यो संकल्प या प्रतिवद्धता गर्छौ भनेमात्रै इच्छुकप्रति सच्चा श्रद्धाञ्जली हुन्छ ।’
