काठमाडाैं | अख्तियार दुरुपयोग अनुसन्धान आयोगले प्रहरी अतिरिक्त महानिरीक्षक (एआईजी) श्यामलाल ज्ञवालीलाई सफाइ दिएको छ ।
हाल नेपाल प्रहरीको मेट्रो प्रमुख रहेका ज्ञवालीविरुद्ध जन्ममिति फरक पारी सरकारी निकायलाई झुक्याएर जागिर खाएको भन्दै अख्तियार दुरुपयोग अनुसन्धान आयोगमा उजुरी परेको थियो । तर, अहिले अख्तियारले प्रहरी प्रधान कार्यालयलाई प्रारम्भिक छानबिन सम्पन्न भएको भन्दै उजुरी तामेलीमा राखिएको पत्र पठाएको छ ।
दर्ता नम्बर सी–०४३७४७ भएको उक्त उजुरी गत फागुन १४ गते अख्तियारमा परेको थियो । सो उजुरी सम्बन्धमा प्रारम्भिक छानबिन सम्पन्न भई आयोगको वैशाख १४ को निर्णय अनुसार पछि थप प्रमाण फेला परेमा कानून बमोजिम हुने गरी हाललाई तामेलीमा राख्ने निर्णय भएको शाखा अधिकृत सन्तोष शर्माले प्रहरी प्रधान कार्यालयलाई गरेको पत्राचारमा उल्लेख छ ।
अख्तियार दुरुपयोग अनुसन्धान आयोग ऐन, २०४८ को दफा १९ को उपदफा (१३) बमोजिम उजुरी तामेलीमा राखेर प्रधान कार्यालयलाई वैशाख १५ मा पत्राचार भएको बताइएको छ ।
जन्ममिति फरक देखिएको उजुरीमा अख्तियार दुरुपयोग अनुसन्धान आयोगले नेपाल प्रहरीका एआइजी श्यामलाल ज्ञवालीलाई क्लिनचिट दिएको छ । उनको जन्ममितिको विवाद कानूनअनुसार नै देखिएको भन्दै उनीविरुद्धको उजुरी तामेलीमा राखेको हो ।
