पोखरा। पैदल यात्रीहरुको झोला तान्ने, डर त्रास देखाउने तथा प्रहरीलाई अभद्र व्यवहार गर्ने एक जनालाई कास्की प्रहरीले पक्राउ गरेको छ।
पोखरा महानगरपालिका -९ पृथ्वीचोक स्थित सडकमा हिँड्ने मानिसहरूको झोला तान्ने डर त्रास देखाउने तथा प्रहरीलाई अभद्र व्यवहार गर्ने पोखरा -१३ बस्ने ३० वर्षीय दिपक बस्नेतलाई प्रहरीले पक्राउ गरेको हो।
प्रहरीका अनुसार बुधबार दिउँसो अन्दाजी १ बजेको समयमा पृथ्वीचोकमा हिंड्ने मानिसहरूको झोला तानेको तथा डर त्रास देखाउने गरेको भन्ने सूचनाका आधारमा ड्युटिमा खटिएका प्रहरीले उनलाई सम्झाई बुझाई गर्ने प्रयास गरेकोमा उल्टो प्रहरी विरुद्ध गाली गलौज र हातपातमा उत्रिएका थिए।
अभद्र व्यवहारमा उत्रिएपछि प्रहरीले बस्नेतलाई नियन्त्रणमा लिएकोमा जिल्ला प्रशासन कार्यालय कास्कीबाट ७ दिनको म्याद थपेर उनीमाथि आवश्यक अनुसन्धान शुरू गरिएको जिल्ला प्रहरी कार्यालय कास्कीले जनाएको छ।
