२८ आषाढ ,काठमाडौ । पश्चिम नवलपरासीको एक चप्पल फ्याक्ट्रीमा आगलागी भएको छ ।

सोमबार साँझ साढे ५ बजेको समयमा रामग्राम नगरपालिका–१० नदवाँस्थित मिलानो ईन्टरनेशनल स्टेप एक्सन पोलिमर्स प्रा.लिमा आगलागी भएको हो ।

उद्योगमा वेल्डिङ्ग गर्ने क्रममा वेल्डिङ्गबाट निस्केको आगोको झिल्का नजिकै राखिएको केमिकलमा पुग्दा आगलागी भएको बताइएको छ । करिब डेढ घण्टापछि आगो नियन्त्रणमा लिइएको प्रहरी उपरीक्षक मनोजकुमार यादवले जानकारी दिए ।

आगो नियन्त्रण गर्न जिल्लाको रामग्राम नगरपालिका, बर्दघाट नगरपालिका र रुपन्देहीको सिद्धार्थ नगरपालिकाको गरी ३ वटा दमकल प्रयोग गरिएको थियो । आगो नियन्त्रणमा लिनका लागि नेपाल प्रहरी, सशस्त्र प्रहरी र स्थानीयवासी समेत खटेका थिए ।

आगलागीबाट भएको क्षतिको विवरण संकलन कार्य भइरहेको प्रहरी उपरीक्षक यादवले बताए ।