१३ मंसिर काठमाडौ । रौतहटको देवाही गोनाही नगरपालिकामा तीन बिगाहा खेतको फलेको धानमा आगलागी भएको छ ।
देवाही गोनाही–७ प्रेमपुर गोनाहीका बुधाई राय यादवको दाँई हाल्न खलिहानमा राखिएको धानको भारीमा आगलागी भएको हो ।
आगलागी बाट खलिहानमा राखिएको ६४० वटा धानको भारी बोझा पूर्णरुपमा जलेर नष्ट भएको पीडित परिवारले जनाएको छ । बुधाई यादवले लगाएको तीन बिगहा धानको भारी जल्दा कम्तिमा २ लाख ५० हजार भन्दा बढीको क्षति भएको जनाइएको छ ।
ईलाका प्रहरी कार्यालय गरुडाका अनुसार प्रहरी र गाउँले मिलेर दमकलको सहयोगमा आगलागी नियन्त्रणमा लिएको छ भने उक्त घटनाबारे थप अनुसन्धान भैरहेको जनाइएको छ ।
