२२ असार ,काठमाडौं । काठमाडौँको ठमेल स्थित ज्याठाबाट प्रहरीले दुर्लभ वन्यजन्तुको अखेटोपहार र जुवा खेल्न प्रयोग गरिने सामग्री सहित ४ जना चिनियाँ नागरिकलाई पक्राउ गरेको छ ।
महानगरीय प्रहरी वृत्त सोह्रखुट्टेको टोलीले गएराती उनीहरूलाई पक्राउ गरेको हो । पक्राउ पर्नेमा झाओ पेनुचेङ्ग, मा जिङ्गबिन, निउ युलियाङ्ग र पेङ्ग हुई छन् ।
चिनियाँहरूको साथबाट ८ लाख ८९ हजार नगद बरामद गरिएको महानगरीय प्रहरी परिसर काठमाडौँका एसएसपी अशोक सिंहले पत्रकार सम्मेलनमा जानकारी दिए । जुवा खेलाइरहेको अवस्थामा प्रहरीले छापा मारेर उनीहरूलाई पक्रेको थियो ।
महानगरीय प्रहरी परिसर काठमाण्डौका प्रमुख एसएसपी अशोक सिंहका अनुसार चिनियाँ नागरिकको साथबाट प्रहरीले २० थान कस्तुरीको बिना, बुद्धचित्त माला, बाघको छाला, गाईको छाला, जुवा खेल्न प्रयोग गरिने गोटी र विद्युतीय टेबल बरामद गरेको छ ।
ज्याठा स्थित जियाङ्गहु खाजान होटेलबाट पक्राउ परेको सो समूह सट्टेबाजीमा संलग्न गिरोह भएको प्रहरीले दाबी गरेको छ ।
